OpenAI සමාගම විසින් ඔවුන්ගේ ජනප්‍රිය චැට්බෝට් එක වන ChatGPT හි වැඩිහිටියන්ට පමණක් වන ‘erotica’ (ලිංගික අන්තර්ගත) ඇතුළු පුළුල් පරාසයක අන්තර්ගතයන් සඳහා ඉදිරියේදී ඉඩ දීමට සැලසුම් කර ඇති බව එහි ප්‍රධාන විධායක නිලධාරී සෑම් ඕල්ට්මන් (Sam Altman) පවසා ඇත. මෙම පියවර ගෙන ඇත්තේ “වැඩිහිටි පරිශීලකයන්ට වැඩිහිටියන් ලෙස සැලකීම” (treat adult users like adults) අරමුණු කරගෙනය.
සෑම් ඕල්ට්මන් සමාජ මාධ්‍යයේ පළ කළ සටහනක සඳහන් කර ඇත්තේ, ඉදිරියේදී නිකුත් කරන චැට්බෝට් හි නව සංස්කරණ මගින් එය වඩාත් මිනිස් ස්වභාවයකින් යුතුව හැසිරීමට හැකි වනු ඇති බවයි. කෙසේ වෙතත්, මෙය “පරිශීලකයින්ට අවශ්‍ය නම් පමණක්” සිදුවන බවත්, “භාවිතය උපරිම කිරීම සඳහා නොවන” බවත් ඔහු අවධාරණය කර ඇත.
මෙම වෙනස Elon Musk ගේ xAI සමාගම විසින් Grok චැට්බෝට් වෙත ලිංගික අන්තර්ගතයන් සහිත චැට්බෝට් දෙකක් හඳුන්වා දීමට ගත් පියවරට සමාන වේ. එමෙන්ම, මෙම නව ප්‍රතිපත්තිය OpenAI වෙත වැඩි ගෙවන ග්‍රාහකයින් ආකර්ෂණය කර ගැනීමට උපකාරී වනු ඇතැයි අපේක්ෂා කෙරේ. එමෙන්ම, මෙම වෙනස්කම් හේතුවෙන් චැට්බෝට් සහායකයන් (chatbot companions) සඳහා වඩාත් දැඩි සීමාවන් හඳුන්වා දීමට නීති සම්පාදකයින් වෙත එල්ල වන පීඩනයද තීව්‍ර වීමට ඉඩ ඇත.
මෙම වසර මුලදී ඇමරිකානු නව යොවුන් වියේ පසුවූ 16 හැවිරිදි ඇඩම් රේන් (Adam Raine) නමැති දරුවා දිවි හානි කර ගැනීම සම්බන්ධයෙන් ඔහුගේ දෙමාපියන් විසින් OpenAI සමාගමට එරෙහිව නඩු පැවරීමෙන් පසුව මෙම වෙනස්කම් නිවේදනය වීම විශේෂත්වයකි.
මෙම නව ප්‍රතිපත්තිය මගින් තාක්ෂණික සමාගම්වල සමාජ වගකීම් සහ මාර්ගගත අන්තර්ගතයන් නියාමනය කිරීමේ අවශ්‍යතාවය පිළිබඳව නව සංවාදයක් ඇති කිරීමට ඉඩ ඇත.
උපුටා ගැනීම: සියළු තොරතුරු BBC ඇසුරෙනි.
