‘වෝග්’ (Vogue) සඟරාවේ අගෝස්තු කලාපයේ මුද්‍රිත සංස්කරණයේ ප්‍රකාශයට පත් වූ ‘ගෙස්’ (Guess) වෙළඳ දැන්වීමක දෝෂ රහිත රන්වන් පැහැති AI (කෘත්‍රිම බුද්ධිය) නිරූපිකාවක් දර්ශනය වී ඇති අතර, මෙය රූපලාවන්‍ය ප්‍රමිතීන් පිළිබඳව දැඩි කතාබහක් නිර්මාණය කර තිබෙනවා.
මෙම වෙළඳ දැන්වීමේ එක් කොනක කුඩා අකුරින් සඳහන් වන්නේ, මෙම නිරූපිකාව AI තාක්ෂණය භාවිතයෙන් නිර්මාණය කර ඇති බවයි. වෝග් සඟරාව පවසන්නේ, AI නිරූපිකාව යොදා ගැනීම කර්තෘ මණ්ඩලයේ තීරණයක් නොවුණත්, AI මගින් නිර්මාණය කරන ලද පුද්ගලයෙකු සඟරාවක පළ වූ පළමු අවස්ථාව මෙය බවයි.
මෙම වෙළඳ දැන්වීම දැඩි මතභේදයට තුඩු දී ඇති අතර, එය සැබෑ නිරූපිකාවන්ට සහ විශේෂයෙන්ම යථාර්ථවාදී නොවන රූපලාවන්‍ය ප්‍රමිතීන් සමඟ පොරබදින තරුණ පරම්පරාවට කුමන බලපෑමක් ඇති කරයිද යන්න පිළිබඳව ප්‍රශ්න මතු කර තිබෙනවා.
‘ගෙස්’ හි මෙම මතභේදාත්මක දැන්වීම පිටුපස සිටින්නේ ‘සෙරෆින් වල්ලෝරා’ (Seraphinne Vallora) නම් සමාගමයි. එහි නිර්මාතෘවරුන් වන වැලන්ටිනා ගොන්සාලෙස් (Valentina Gonzalez) සහ ඇන්ඩ්‍රියා පෙට්‍රෙස්කු (Andreea Petrescu) පවසා ඇත්තේ, ‘ගෙස්’ හි සම-නිර්මාතෘ පෝල් මාර්සියානෝ (Paul Marciano) විසින් ඉන්ස්ටග්‍රෑම් (Instagram) ඔස්සේ ඔවුන්ව සම්බන්ධ කරගෙන, ප්‍රචාරණ ව්‍යාපාරයේ කොටසක් ලෙස AI නිරූපිකාවක් නිර්මාණය කරන ලෙස ඉල්ලා සිටි බවයි.
උපුටා ගැනීම: සියළු තොරතුරු BBC ඇසුරෙනි.
