ප්‍රසිද්ධ ඩියෝඩ්රන්ට් සන්නාමයක් වන මිචම් (Mitchum) විසින්, තම නිෂ්පාදන භාවිත කළ පාරිභෝගිකයින්ගේ කිහිප දෙනෙකුගේ කිහිලිවල කැසීම සහ දැවිල්ල ඇතිවීම සම්බන්ධයෙන් සමාව අයැද තිබේ.
මිචම් සමාගමේ පැය 48ක් සඳහා වන රෝල්–ඔන් (roll-on) වර්ගයේ ඇන්ටි–පර්ස්පිරන්ට් (anti-perspirant) සහ ඩියෝඩ්රන්ට් නිෂ්පාදනය භාවිත කළ පාරිභෝගිකයින් සමාජ මාධ්‍ය ඔස්සේ පැමිණිලි කර ඇත්තේ, මෙම නිෂ්පාදන භාවිතයෙන් පසු ඔවුන්ගේ කිහිලිවල දැඩි වේදනාකාරී බිබිලි, රතු පැහැ ගැන්වීම් සහ දැවිල්ල ඇති වූ බවයි.
සමාගම කියා සිටියේ, මෙම තත්ත්වය පිළිබඳව සැබවින්ම කනගාටු වන බවත්, නිෂ්පාදන ක්‍රියාවලියේ සිදු වූ වෙනසක් එක්සත් රාජධානිය, අයර්ලන්තය සහ දකුණු අප්‍රිකාවේ අලෙවි කරන ලද මිලිලීටර් 100ක තොගවලට බලපා ඇති බවත්ය. බලපෑමට ලක් වූ නිෂ්පාදන රාක්කවලින් ඉවත් කරමින් සිටින බව ද ඔවුහු පවසා ඇත.
මෙම ගැටලුවට හේතුව දැනට පරීක්ෂණ මට්ටමේ පවතින බවද ඔවුන් වැඩිදුරටත් සඳහන් කළේය. මෙම සිදුවීම සමාගමට විශාල විවේචනයක් එල්ල වීමට හේතු වී ඇති අතර, පාරිභෝගිකයින් බොහෝ දෙනෙක් සන්නාමයේ විශ්වාසනීයත්වය පිළිබඳව ප්‍රශ්න කර තිබේ.
උපුටා ගැනීම: සියළු තොරතුරු BBC ඇසුරෙනි.
