ටෙස්කෝ සුපිරි වෙළඳසැල් විසින් අලිගැටපේරවල ඉදුණු බව පරීක්ෂා කිරීමේ යන්ත්‍රයක් අත්හදා බලන අතර, එය සාප්පු සවාරි යන්නන්ට හොඳ උපක්‍රමයක් ද, නැතහොත් අතින් මිරිකා බැලීම ප්‍රමාණවත් ද යන්න පිළිබඳව විවිධ අදහස් මතුවී ඇත.
අලිගැටපේර ටෝස්ට් (Avocado toast) යනු ජනප්‍රිය ආහාරයකි. නමුත් එය නිවැරදිව සාදා ගැනීමට අලිගැටපේර ප්‍රමාණවත් තරම් ඉදුණු විය යුතුය. එබැවින්, එංගලන්තයේ ටෙස්කෝ වෙළඳසැල් පහක අලිගැටපේර මිලදී ගන්නන්ට ඒවා කෙතරම් ඉදුණු ද යන්න දැන ගැනීමට යන්ත්‍රයකින් පරිලෝකනය (scan) කළ හැකිය.
සේව් ද ස්ටූඩන්ට් (Save the Student) ආයතනයේ මුදල් පිළිබඳ විශේෂඥයෙකු වන ටොම් ඇලින්හැම් පවසා ඇත්තේ, මිනිසුන් ගෙවන මුදලට ලැබෙන්නේ කුමක්දැයි දැන ගැනීමට ඔවුන්ට අයිතියක් ඇති බවයි. නමුත් ටේලර් හෙරින්ග් (Taylor Herring) සන්නාම උපදේශක සමාගමේ ප්‍රධාන විධායක නිලධාරී ජේම්ස් හෙරින්ග් පවසා ඇත්තේ මෙය හුදෙක් තාක්ෂණික උපක්‍රමයක් බවත්, අලිගැටපේරයක් ඉක්මනින් මිරිකා බැලීම ද මේ සඳහා හොඳින් ක්‍රියා කරන බවත්ය.
මෙම අත්හදා බැලීම සඳහා තෝරාගෙන ඇති ටෙස්කෝ වෙළඳසැල් පහ වන්නේ එසෙක්ස් හි කොල්චෙස්ටර් සුපිරි වෙළඳසැල, වෝවික්ෂයර් හි ස්ට්‍රැට්ෆෝර්ඩ් අපෝන් ඒවන් සුපිරි වෙළඳසැල, බර්ක්ෂයර් හි වෝකිංහැම් සුපිරි වෙළඳසැල, විල්ට්ෂයර් හි සලිස්බරි එක්ස්ට්‍රා සහ හර්ට්ෆෝඩ්ෂයර් හි චේෂන්ට් එක්ස්ට්‍රා යන ස්ථානයි.
මෙම ස්කෑනරය ඉදුණු බව මැනීම සඳහා අධෝරක්ත තාක්ෂණය භාවිතා කරන බව ටෙස්කෝ පවසා ඇත. එයින් ලබාදෙන්නේ ප්‍රතිඵල දෙකක් පමණි: “පොඩි කිරීමට වහාම සූදානම්” හෝ “කැබලි කිරීමට වඩාත් සුදුසු” බවයි. මෙම යන්ත්‍රය, ලන්දේසි සමාගමක් විසින් නිපදවන ලද “වන් තර්ඩ් අවොකාඩෝ ස්කෑනර්” (One Third Avocado Scanner) ලෙස හැඳින්වේ.
උපුටා ගැනීම: සියළු තොරතුරු BBC ඇසුරෙනි.
