රුසියාව විසින් යුක්‍රේන අගනුවර වන කියෙව් (Kyiv) නගරයට එල්ල කරන ලද මහා පරිමාණ රාත්‍රී ප්‍රහාරයකින් අවම වශයෙන් දෙදෙනෙකු මියගොස් 16 දෙනෙකු තුවාල ලබා ඇති බව ජනාධිපති ව්ලොදිමිර් සෙලෙන්ස්කි (Volodymyr Zelensky) ප්‍රකාශ කර තිබෙනවා.
මෙම ප්‍රහාරයට මිසයිල 18ක් සහ ඩ්‍රෝන යානා 400ක් පමණ යොදාගෙන ඇති අතර, ප්‍රධාන වශයෙන් අගනුවර ඉලක්ක කර ඇති බව සෙලෙන්ස්කි වැඩිදුරටත් සඳහන් කර ඇත. බලධාරීන් පැවසුවේ, ඩ්‍රෝන යානා සුන්බුන් නේවාසික ගොඩනැගිල්ලක වහලයට වැදී ඇති බවත්, නගරය පුරා ගිනි හටගෙන ඇති බවත්ය.
එක්සත් ජාතීන්ගේ සංවිධානයට අනුව, ජූනි මාසයේදී යුක්‍රේනය වසර තුනක් තුළ ඉහළම මාසික සිවිල් වැසියන්ගේ හානි සංඛ්‍යාව වාර්තා කළ අතර, පුද්ගලයන් 232ක් මියගොස් 1,343ක් තුවාල ලබා ඇත. බ්‍රහස්පතින්දා (ජූලි 10) අලුයම යුක්‍රේන පොලීසිය වාර්තා කළේ, රුසියානු ඩ්‍රෝන ප්‍රහාර කියෙව් හි දිස්ත්‍රික්ක අටකට බලපා ඇති බවයි.
අභ්‍යන්තර කටයුතු අමාත්‍ය ඉගෝර් ක්ලිමෙන්කෝ (Ihor Klymenko) තහවුරු කළේ, මෙට්‍රෝ දුම්රිය ස්ථානයකදී 68 හැවිරිදි කාන්තාවක් සහ 22 හැවිරිදි පොලිස් නිලධාරියෙකු මියගොස් ඇති බවයි. කියෙව්හි පොඩිල්ස්කි (Podilsky) දිස්ත්‍රික්කයේ, ප්‍රාථමික සෞඛ්‍ය සේවා මධ්‍යස්ථානයක් සම්පූර්ණයෙන්ම පාහේ විනාශ වී ඇති බව නගරාධිපති විටාලි ක්ලිට්ස්කෝ (Vitaliy Klitschko) පවසා ඇත.
උපුටා ගැනීම: සියළු තොරතුරු BBC ඇසුරෙනි.
