අමෙරිකාව විසින් ඉරාන න්‍යෂ්ටික බලාගාර තුනකට (ෆෝඩෝව්, ඉස්ෆහාන්, නටාන්ස්) ප්‍රහාර එල්ල කිරීමෙන් පසු එක්සත් ජාතීන්ගේ ආරක්ෂක කවුන්සිලය (UNSC) හදිසි සැසිවාරයක් කැඳවා තිබේ. මෙය සාමාජික රාජ්‍ය කිහිපයක දැඩි දෝෂාරෝපණවලට තුඩු දුන් අතර, මැදපෙරදිග සටන් විරාමයක් සඳහා යළිත් කැඳවුම් කිරීමට හේතු විය. මේ අතර, ඊශ්‍රායලය සහ අමෙරිකාව තම මිත්‍ර පාක්ෂිකයන් ලෙස මෙම ප්‍රහාරය අගය කළහ.
එක්සත් ජාතීන්ගේ ආරක්ෂක කවුන්සිලයට අදහස් දක්වමින්, එක්සත් ජාතීන්ගේ මහලේකම් ඇන්ටෝනියෝ ගුටරෙස් කලාපය දැන් මාරාන්තික බවට අනතුරු අඟවා ඇත. “එක්සත් ජනපදය විසින් ඉරාන න්‍යෂ්ටික පහසුකම්වලට බෝම්බ හෙළීම දැනටමත් කැලඹී ඇති කලාපයක භයානක හැරවුම් ලක්ෂ්‍යයක් සනිටුහන් කරයි,” ගුටරෙස් පැවසීය. අප සටන් නතර කර ඉරාන න්‍යෂ්ටික වැඩසටහන පිළිබඳ බරපතල, අඛණ්ඩ සාකච්ඡා වෙත ආපසු යාමට වහාම සහ තීරණාත්මකව ක්‍රියා කළ යුතුයි.” යනුවෙන් ඔහු වැඩිදුරටත් අදහස් දක්වා ඇත.
වැඩබලන අමෙරිකානු තානාපතිනි ඩොරති ෂියා (Dorothy Shea) හමුදා ක්‍රියාමාර්ගය ආරක්ෂා කරමින් කියා සිටියේ, අමෙරිකානු පුරවැසියන් සහ මිත්‍ර පාක්ෂිකයන් ආරක්ෂා කිරීම සඳහා වොෂින්ටනය ඉරානයේ න්‍යෂ්ටික පොහොසත් කිරීමේ ධාරිතාව විසුරුවා හැරීමට පියවර ගත් බවයි. “අවසානයේදී එක්සත් ජනපදයට තම මිතුරා සහ අපගේම අවශ්‍යතා ආරක්ෂා කර ගැනීම සඳහා තීරණාත්මකව ක්‍රියා කිරීමට කාලය පැමිණියා,” ෂියා ආරක්ෂක කවුන්සිලයට පැවසීය.
ඉරාන තානාපති අලි බහරේනි (Ali Bahreini) කියා සිටියේ, ඊශ්‍රායල සහ අමෙරිකානු ප්‍රහාර “රික්තකයක් තුළ” සිදු නොවූ බවත්, ඒවා අමෙරිකාවේ සහ එහි යුරෝපීය හවුල්කරුවන්ගේ “දේශපාලනික අභිප්‍රේරිත ක්‍රියාවන්ගේ” ප්‍රතිඵලයක් බවත්ය. අමෙරිකාව “රාජ්‍යතාන්ත්‍රිකභාවය විනාශ කිරීමට තීරණය කළා” යැයි ඔහු පැවසීය. ඉරාන හමුදාව තම ප්‍රතිචාරයේ “වේලාව, ස්වභාවය සහ පරිමාණය” තීරණය කරනු ඇති බව ඔහු පැහැදිලිවම කියා සිටියේය.
මේ අතර, ඊශ්‍රායලයේ එක්සත් ජාතීන්ගේ නියෝජිත ඩැනී ඩැනන් (Danny Danon) ප්‍රහාර මගින් ලෝකය “වඩා ආරක්ෂිත ස්ථානයක්” බවට පත් කළ බව පවසමින්, හෙළා දැකීම් සඳහා වූ ඉල්ලීම් ප්‍රතික්ෂේප කළේය. ටෙහෙරානයේ පාලන තන්ත්‍රය වෙනස් කිරීමට ඊශ්‍රායලය සහාය දෙන්නේදැයි විමසූ විට, ඔහු පැවසුවේ, “ඒක තීරණය කළ යුත්තේ ඉරාන ජනතාවයි, අපි නෙවෙයි” යනුවෙනි.
චීන තානාපති ෆූ කොං (Fu Cong) අමෙරිකානු ප්‍රහාර හෙළා දුටු අතර, සංයමයෙන් කටයුතු කරන ලෙස ඉල්ලා සිටියේය. “අපි ක්ෂණික සටන් විරාමයක් ඉල්ලා සිටිනවා,” ඔහු පැවසීය. “තත්ත්වය පාලනයෙන් බැහැර වීමේ අවදානම ගැන චීනය දැඩි කනස්සල්ලෙන් පසුවෙනවා.”
පාකිස්තාන තානාපති අසීම් ඉෆ්තිකර් අහමඩ් (Asim Iftikhar Ahmad) ද අමෙරිකානු බෝම්බ ප්‍රහාරය ගැඹුරින් කනස්සල්ලට කරුණක් ලෙස හෙළා දුටුවේය. “ඊශ්‍රායල ආක්‍රමණය සහ නීති විරෝධී ක්‍රියා හේතුවෙන් ආතතීන් සහ ප්‍රචණ්ඩත්වය තියුණු ලෙස ඉහළ යාම අතිශයින් කනස්සල්ලට කරුණක්,” ඔහු පැවසීය. “මෙම අභියෝගාත්මක කාලය තුළ පාකිස්තානය ඉරාන රජය සහ සහෝදර ජනතාව සමඟ සහයෝගයෙන් කටයුතු කරනවා.”
අමෙරිකානු හමුදා ඉරානයේ ප්‍රධාන න්‍යෂ්ටික බලාගාර “මුළුමනින්ම විනාශ කළා” යන ට්‍රම්ප්ගේ ප්‍රකාශය, 1979 විප්ලවයෙන් පසු ටෙහෙරානයට එරෙහිව බටහිර රටවල් ගත් වඩාත්ම වැදගත් හමුදා ක්‍රියාමාර්ගය සනිටුහන් කළේය.
උපුටා ගැනීම: සියළු තොරතුරු ALJAZEERA ඇසුරෙනි.
