අමෙරිකානු ජනාධිපති ඩොනල්ඩ් ට්‍රම්ප් පවසන්නේ මැදපෙරදිග සටන් විරාමය ඊශ්‍රායලය සහ ඉරානය යන දෙරටම උල්ලංඝනය කර ඇති බවයි.
නේටෝ (NATO) සමුළුවට සහභාගී වීම සඳහා හේග් (The Hague) බලා පිටත්ව යාමට පෙර මාධ්‍යවේදීන් අමතමින් ඔහු කියා සිටියේ, ඊශ්‍රායලය සහ ඉරානය සම්බන්ධයෙන් තමා “සතුටු නොවන” බවත්, ඊට අමතරව ඊශ්‍රායලය සම්බන්ධයෙන් තමා “ඇත්තටම සතුටු නොවන” බවත්ය.
ඉරානයේ න්‍යෂ්ටික හැකියාවන් “ගිලිහී ගොස් ඇති” බවත්, ටෙහෙරානය කිසි විටෙකත් තම න්‍යෂ්ටික වැඩසටහන නැවත ගොඩනඟන්නේ නැති බවත් ට්‍රම්ප් වැඩිදුරටත් පැවසීය. පසුව ට්‍රූත් සෝෂල් (Truth Social) හි පළ කළ සටහනක ට්‍රම්ප් කියා සිටියේ, ඊශ්‍රායලය දැන් ඉරානයට බෝම්බ හෙලුවහොත් එය “ප්‍රධාන උල්ලංඝනයක්” වනු ඇති බවයි. ඔහු ඊශ්‍රායලයට “ඔබේ ගුවන් නියමුවන් දැන් ගෙදර ගෙන්වා ගන්න” යනුවෙන් ද පැවසීය.
“මම ඊශ්‍රායලය ගැන සතුටු නැහැ. මූලිකවම අපට රටවල් දෙකක් තිබෙනවා, ඔවුන් එතරම් කාලයක් සහ එතරම් දරුණු ලෙස සටන් කරමින් සිටිනවා, ඔවුන් කරන්නේ කුමක්දැයි ඔවුන් දන්නේ නැහැ.” යනුවෙන් ඔහු වැඩිදුරටත් පවසා ඇත.
උපුටා ගැනීම: සියළු තොරතුරු Sky News ඇසුරෙනි.
