ඉරානයේ උත්තරීතර නායක අයතුල්ලා අලි කමේනි (Ayatollah Ali Khamenei) අමෙරිකා එක්සත් ජනපදයට දැඩි අනතුරු ඇඟවීමක් කරමින් කියා සිටියේ, අනාගත තර්ජන ඇති වුවහොත් අමෙරිකානු කඳවුරුවලට නැවත ප්‍රහාර එල්ල කළ හැකි බවයි. වාර්තා පෙන්වා දෙන්නේ, ඊශ්‍රායලය ගාසා තීරයට එල්ල කරන ප්‍රහාර හේතුවෙන් අද උදෑසන අවම වශයෙන් 51 දෙනෙකු මිය ගොස් ඇති අතර, ඉන් 14 දෙනෙකු උතුරු ගාසා තීරයේදී මිය ගොස් ඇති බවයි.
පවතින ගැටුම දෙපාර්ශ්වයටම සැලකිය යුතු ජීවිත හානි සිදු කර ඇත. ඉරානයේ සෞඛ්‍ය අමාත්‍යාංශය වාර්තා කරන්නේ, ඊශ්‍රායලය දින 12ක් පුරා එල්ල කළ ප්‍රහාරවලින් අවම වශයෙන් 627 දෙනෙකු මිය ගොස් 4,870කට වැඩි පිරිසක් තුවාල ලබා ඇති බවයි. ඊට ප්‍රතිවිරුද්ධව, ඉරානය ඊශ්‍රායලයට එල්ල කළ ප්‍රහාරවලින් අවම වශයෙන් 28 දෙනෙකු මිය ගොස් තිබේ.
ගාසා තීරයේ සෞඛ්‍ය අමාත්‍යාංශය පවසන්නේ, ඊශ්‍රායලයේ ගාසා යුද්ධයෙන් අවම වශයෙන් 56,156 දෙනෙකු මිය ගොස් 132,239 දෙනෙකු තුවාල ලබා ඇති බවයි. ඔක්තෝබර් 7 වන දින එල්ල වූ ප්‍රහාරවලදී ඊශ්‍රායලයේ 1,139 දෙනෙකු පමණ මිය ගිය අතර 200කට වැඩි පිරිසක් ප්‍රාණ ඇපයට ගෙන ඇත.
මේ අතර, අමෙරිකානු ජනාධිපති ඩොනල්ඩ් ට්‍රම්ප් නිවේදනය කළේ, අමෙරිකානු සහ ඉරාන නිලධාරීන් ලබන සතියේ සාකච්ඡා පැවැත්වීමට නියමිත බවයි. මෙම තත්ත්වය වර්ධනය වී ඇත්තේ, ඉරානයේ ගාඩියන් කවුන්සිලය (Guardian Council) එක්සත් ජාතීන්ගේ IAEA (ජාත්‍යන්තර පරමාණුක බලශක්ති ඒජන්සිය) සමඟ සහයෝගීතාවය අත්හිටුවීමෙන් පසුවය.
උපුටා ගැනීම: සියළු තොරතුරු ALJAZEERA ඇසුරෙනි.
