ඩුබායිහිදී පැවැති ආසියානු කුසලාන සුපිරි හතර වටයේ තරගයකදී ඉන්දියාව සිය ප්‍රධාන ප්‍රතිවාදියා වන පාකිස්තානය කඩුලු 6කින් පරාජය කළේය. මෙය මෙම තරගාවලියේදී ඉන්දියාව පාකිස්තානයට එරෙහිව ලැබූ දෙවැනි ජයග්‍රහණයයි. ලකුණු 172ක ඉලක්කයක් හඹා ගිය ඉන්දීය කණ්ඩායම, අභිෂේක් ෂර්මා සහ ශුබ්මන් ගිල් අතර ගොඩනැඟුණු විශිෂ්ට ලකුණු 105ක සබඳතාවක් හේතුවෙන් පන්දු 7ක් ඉතිරිව තිබියදී ජයග්‍රහණය වාර්තා කළේය.
පළමුවෙන් පන්දුවට පහර දුන් පාකිස්තානය වෙනුවෙන්, සාහිබ්සාදා ෆර්හාන් පන්දු 45කදී ලකුණු 58ක් ලබා ගනිමින් අර්ධ ශතකයක් වාර්තා කළේය. සයිම් අයූබ් ලබා දුන් ලකුණු 21ක දායකත්වය සමඟින් පාකිස්තානය ඕවර 10 අවසානයේදී කඩුලු 1ක් දැවී ලකුණු 91ක් ලබා ගත්තේය. කෙසේ වෙතත්, මැද ඕවරවලදී කඩුලු කිහිපයක් ඉක්මනින් බිඳ වැටීම නිසා ඔවුන්ගේ ලකුණු වේගය සීමා විය. අවසානයේදී සල්මාන් අලි අගා (නොදැවී 17) සහ ෆහීම් අෂ්රෆ් (පන්දු 8කදී නොදැවී 20)ගේ වේගවත් ඉනිම හේතුවෙන් පාකිස්තානයට ලකුණු 171ක් ලබා ගැනීමට හැකි විය.
පිළිතුරු ඉනිම ඇරඹූ අභිෂේක් ෂර්මා පළමු පන්දුවටම ෂහීන් අෆ්රිඩිගේ පන්දුවකට හයේ පහරක් එල්ල කරමින් තරගයට හොඳ ආරම්භයක් ලබා දුන් අතර, පන්දු 24කදී සිය අර්ධ ශතකය සම්පූර්ණ කළේය. පන්දු 39කදී ඔහු ලබා ගත් ලකුණු 74, ගිල්ගේ ලකුණු 46 සමඟින් ඉන්දියාවට තරගය පිළිබඳ පූර්ණ පාලනයක් ලබා දුන්නේය. පාකිස්තානය ඉක්මන් කඩුලු කිහිපයක් දවා ගත්තද, අවසාන ඕවරයේදී අෆ්රිඩිට එරෙහිව තිලක් වර්මා එල්ල කළ හයේ සහ හතරේ පහරවල් සමඟින් ලකුණු 30ක් ලබා ගනිමින් ඉන්දියාවට ජය තහවුරු කළේය.
ක්‍රීඩකයන් අතර උණුසුම් වචන හුවමාරු වීමෙන් පිටිය තුළ දැඩි ආතතියක් පැවති අතර, එය ඉන්දු-පාකිස්තාන සබඳතාවල පවතින අර්බුදය පිළිබිඹු කරයි. ඉදිරියේදී ඉන්දියාව බංග්ලාදේශයට එරෙහිව ද, පාකිස්තානය ශ්‍රී ලංකාවට එරෙහිව ද තරග කිරීමට නියමිතය.
උපුටා ගැනීම: සියළු තොරතුරු ALJAZEERA ඇසුරෙනි.
